პარლამენტთან, პროფკავშირების ორგანიზებით, უკრაინისადმი სოლიდარობისა და საქართველოს ევროინტეგრაციის მხარდამჭერი აქცია გაიმართა. ადგილზე, სხვადასხვა პროფესიის ათასობით ადამიანმა მოიყარა თავი, მათ შორის იყვნენ უკრაინელი ლტოლვილები, რომელთაც საქართველოს შეაფარეს თავი. ერთ-ერთი მათგანი სცენაზე სიტყვითაც გამოვიდა  და აქციის მონაწილეებს მხარდაჭერისა და თანადგომისთვის მადლობა გადაუხადა.

„დღეს მთელი უკრაინის სახელით გიხდით მადლობას. ჩვენს ქვეყნებს: უკრაინას, საქართველოსა და მოლდოვას აქვთ საერთო გეოპოლიტიკური პრობლემა სახელად – რუსეთი. ჩვენ უნდა დავიცვათ ჩვენი ქვეყნების ისტორია. ერთად დგომით უნდა შევძლოთ ევროინტეგრაციაც და მჯერა, რომ ჩვენ ამას შევძლებთ“ – განაცხადა  აქციის უკრაინელმა მონაწილემ.

მშვიდობიანი აქციის დაწყებამდე სპეციალურად დამონტაჟებულ ეკრანზე, უკრაინაში მიმდინარე ომისა და რუსეთ-საქართველოს 2008 წლის ომის ამსახველი კადრები გავიდა. ეს იყო დემონსტრაცია იმისა, თუ რა ფორმით ებრძვის ოკუპანტი ქვეყანა ამ დრომდე უკრაინას და რა გამოიარა საქართველომ.

აქციის ორგანიზატორებმა და მონაწილეებმა კიდევ ერთხელ გამოხატეს სოლიდარობა უკრაინელი ხალხის მიმართ და დაგმეს რუსული აგრესია. პროფკავშირების თავმჯდომარის, ირაკლი პეტრიაშვილის სიტყვით გამოსვლისას ადგილზე შეკრებილები ტრანსფარანტებითა და დროშებით სკანდირებდნენ ფრაზებს: „არა ომს“, „დიდება საქართველოს და დიდება უკრაინას“.

ირაკლი პეტრიაშვილმა ხაზი გაუსვა, რომ ახლა საჭიროა ერთმანეთთან დაპირისპირებისა და მტრის ხატის ძებნის გარეშე, ერთმანეთს შორის განსხვავებების მიუხედავად, ევროინტეგრაციისადმი მისწრაფებისა და უკრაინის მხარდაჭერის საკითხში საზოგადოების კონცენტრირება მთავარი პრიორიტეტი იყოს.

„ღირსეული ქვეყნის, ღირსეულო შვილებო, თქვენი აქ მოსვლა დასტურია იმისა, რომ ვერცერთი ორატორი იმაზე მეტს ვერ იტყვის, ვიდრე თქვენი აქ მოსვლით გამოხატეთ თქვენი აზრი, რომ დავაფიქსიროთ ჩვენი მხარდაჭერა უკრაინელი ხალხის მიმართ და სწორუპოვარი სვლა ევროინტეგრაციისკენ. ჩვენი აქ შეკრება გზავნილია მტრისთვისაც და მოყვარისთვისაც. მტრისთვის ის, რომ  გაჭირვებაში არასდროს დავტოვებთ ადამიანებს, რომლებიც იზიარებენ იგივე შეხედულებას, სვლას ევროპისკენ, ევროპული ღირებულებებისკენ, რაც გულისხმობს დემოკრატიას, სამართლიან თანაცხოვრებას, ღირსეულ ცხოვრებას და ამავე დროს პასუხისმგებლობის გადანაწილებას საზოგადოებაზე და საზოგადოების მიერ პასუხისმგებლობის აღებას ქვეყნის მართვაზე. სწორედ ეს არის განსხვავება იმას შორის, რა უნდა უკრაინას და რას ებრძვის რუსეთი “ – მიმართა ირაკლი პეტრიაშვილმა აქციის მონაწილეებს.

პროფკავშირების გაერთიანების თავმჯდომარემ ადგილზე შეკრებილებს ETUC-ისა და PERC-ის გენერალური მდივნის წერილიც წაუკითხა. ლუკა ვისენტინის მისასალმებელ სიტყვაში ხაზგასმით არის აღნიშნული იმ სამი ქვეყნის ეროკავშირში გაწევრიანების პერსპექტივის მხარდაჭერა, რომელთაც  ასოცირების ხელშეკრულება აქვთ გაფორმებული.

ევროპის პროფკავშირების კონფედერაციისა და პან-ევროპული საბჭოს გენერალური მდივნის ცნობით, ეს დღის წესრიგი უკვე განიხილეს ევროკომისიის პრეზიდენტთან, ურსულა ვონ დერ ლაიენთან და ამ საკითხის წინ წამოსაწევად ყველა შესაძლებლობასა და საშუალებას გამოიყენებენ.

იხილეთ ფოტოები