2023 წლის 2 მაისს სსიპ საგანგებო სიტუაციების კოორდინაციისა და გადაუდებელი დახმარების ცენტრმა ძმები ტ.გ. და მ.გ. სამსახურიდან გაათავისუფლა. მიზეზად ნარკოტიკის მოხმარებით გამოხატული სამუშაო ვალდებულებათა უხეში დარღვევა დაასახელა. რეალურად, ნარკოლოგიური შემოწმების დღეს სამუშაოს შესრულებისას ტ.გ. და მ.გ. ფხიზელ მდგომარეობაში იყვნენ. ეს დაადასტურეს ცვლაში მათთან ერთად მომუშავე კოლეგა ექიმებმაც.

გასული წლის 14 აპრილს სსიპ საგანგებო სიტუაციების კოორდინაციისა და გადაუდებელი დახმარების ცენტრში სასწრაფო დახმარების ბრიგადის ექიმი ტ.გ და მძღოლი მ.გ. დამსაქმებლის მოთხოვნით ნარკოლოგიური შემოწმების ჩასატარებლად სასწრაფოდ სამხარაულის ექსპერტიზის ბიუროში  გადაიყვანეს. 14 აპრილი, წითელი პარასკევი უქმე დღე იყო. ექსპერტი ბიუროში არ იმყოფებოდა. ამიტომ დასაქმებულების შესამოწმებლად საგანგებოდ მიიყვანეს. ექსპერტმა დაასკვნა მარიხუანას მოხმარების ფაქტი, მაგრამ არ შეუმოწმებია  ნარკოტიკული ზემოქმედების ქვეშ ყოფნა-არყოფნა.

დამსაქმებელი ამტკიცებდა, რომ დასაქმებულს არც არასამუშაო დროს აქვს მარიხუანას მოხმარების უფლება, რადგან ეს არაეთიკური ქცევაა და სამსახურის პრესტიჟს ლახავს. გარდა იმისა, რომ ძმებმა სამსახური და შემოსავალი დაკარგეს, გათავისუფლებამდე 18 დღის განმავლობაში ცენტრმა მათ სამუშაოს შესრულების შესაძლებლობა აღარ მისცა, ამყოფებდა იძულებითი მოცდენის პირობებში და არ უხდიდა ხელფასს.

ტ.გ. და მ.გ. აფხაზეთიდან დევნილები არიან. ხშირად შვებულებას  გალში ატარებენ. გასული წლის იანვარში, ახალი წლის დღეებში, ორივე მათგანი გალში, შვებულებაში იმყოფებოდა. ისინი ადასტურებენ, რომ მარიხუანა სწორედ ამ პერიოდში მოიხმარეს.

თავად ძმები გათავისუფლებას საპროტესტო აქტიურობას უკავშირებენ, რადგან აქტიურად მონაწილეობდნენ დამსაქმებლის წინააღმდეგ გამართულ აქციებში, რომელთა მოთხოვნა სასწრაფო დახმარების მედ. პერსონალისთვის ხელფასების გაზრდა და შრომის პირობების გაუმჯობესება იყო.

18 სექტემბერს მოსამართლე სოსო ღურწკაიამ დასაქმებულთა სარჩელი სრულად დააკმაყოფილა: ცენტრის ბრძანებები გათავისუფლების შესახებ ბათილად ცნო; ტ.გ. და მ.გ. აღადგინა სამსახურში გათავისუფლებამდე პოზიციებზე; ცენტრს დააკისრა იძულებითი განაცდურის, გათავისუფლებამდე სამუშაოს შესრულების შესაძლებლობის წართმევის გამო იძულებითი მოცდენის, იძულებითი მოცდენის გადახდის დაგვიანების გამო პირგასამტეხლოსა და სასამართლო ხარჯის ანაზღაურება. დღეის მდგომარეობით ტ.გ.-ს მიმართ დაკისრებული თანხა 32 542.9 ლარს შეადგენს; მ.გ.-ს მიმართ დაკისრებული კი _ 27 495.4 ლარს. თანხის ოდენობა გაიზრდება სასამართლო გადაწყვეტილების აღსრულების თარიღამდე.

გადაწყვეტილება მნიშვნელოვანია იმ თვალსაზრისით, რომ სასამართლომ პასუხი გასცა დამსაქმებლის თვითნებობას. მარიხუანას პირადი მიზნით მოხმარება საქართველოში საკონსტიტუციო სასამართლოს გადაწყვეტილებებით დეკრიმინალიზებულია. „შრომის უსაფრთხოების შესახებ“ ორგანული კანონი დამსაქმებელს უფლებას აძლევს, სამუშაო ადგილზე არ დაუშვას არაფხიზელ მდგომარეობაში მყოფი პირი, რაც გულისხმობს იმას, რომ სამუშაო ადგილზე დასაქმებული არ უნდა გამოცხადდეს ნარკოტიკული ან სხვაგვარი თრობის ქვეშ. სამუშაო დროისა და ადგილის მიღმა ნარკოტიკული ნივთიერების მიღება არ ექცევა დამსაქმებლისთვის კანონით მინიჭებული უფლებამოსილების ფარგლებში. მხოლოდ იმიტომ, რომ დასაქმებულმა მოიხმარა ნარკოტიკი, ამ ფაქტის ან ასეთი ქცევის მიუღებლობა და ამის საფუძველზე გათავისუფლება წარმოადგენს უკანონო, თვითნებურ და სტერეოტიპებით ნაკარნახევ ქმედებას. შესაძლოა, მარიხუანას მოხმარება ამა თუ იმ დირექტორისთვის არაეთიკური იყოს, მაგრამ სასამართლოს გადაწყვეტილებამ ხაზი გაუსვა კანონის უზენაესობას, დაუშვებელია, სუბიექტური შეხედულებებით დასაქმებულთა უფლებების შელახვა.

ტ.გ.-ს და მ.გ.-ს ინტერესებს პროფკავშირების გაერთიანების იურისტი თამილა გაბაიძე იცავს.