საქართველოს პროფკავშირების გაერთიანების თავმჯდომარე, ბერლინში გერმანიის პროფკავშირების საარჩევნო ყრილობას სპეციალური სტუმრის სტატუსით ესწრება.  ყრილობა გერმანიის ფედერალურმა პრეზიდენტმა ფრანკ ვალტერ შტაინმაიერმა გახსნა. შეხვედრის მონაწილეებს მიმართეს ბერლინის მმართველმა მერმა მიქაელ მიულერმა და გერმანიის პროფკავშირების კონფედერაციის თავმჯდომარემ რაინერ ჰოფმანმა.

დღეს გერმანიის პროფკავშირების პრეზიდენტის არჩევნები გაიმართა, პოსტს ხმათა უმრავლესობით რაინერ ჰოფმანი ინარჩუნებს. ჰოფმანს არჩევნებში გამარჯვება ირაკლი პეტრიაშვილმა პირადად მიულოცა. საქართველოს და გერმანიის პროფკავშირებს ახლო პარტნიორული ურთიერთობა წლებია აკავშირებს. გერმანიის პროფკავშირები მსოფლიოში ერთ ერთი გამორჩეულად პროგრესული გაერთიანებაა და საქართველოს პროფკავშირების არაერთი ინიციატივის და პროექტის მხარდამჭერია, მათ შორის საპენსიო რეფორმაზე მომზადებული ინიციატივის. სწორედ ამ საკითხზე იმსჯელეს ჰოფმანმა და პეტრიაშვილმა არჩევნების შემდეგ, პირისპირ გამართულ შეხვედრაზე. პეტრიაშვილმა ჰოფმანთან საუბრისას რეფორმასთან მიმართებაში განვითარებულ მოვლენებს, შემაშფოთებელ ფაქტორებს და “ფრიდრიხ ებერტის” ფონდის ცალსახა მხარდაჭერის საჭიროებას გაუსვა ხაზი. გერმანიის პროფკავშირების თავმჯდომარის ინიციატივითვე ხანგრძლივი მსჯელობა ამ საკითხსა და აღშფოთების მიზეზებზე “ფრიდრიხ ებერტის” ფონდის ვიცე პრეზიდენტის მიხაელ ზომერის ჩართულობით გაგრძელდა. რაინერ ჰოფმანმა ირაკლი პეტრიაშვილის მოწვევით წელს საქართველოში ვიზიტი დაგეგმა.

ხვალ გერმანიის პროფავშირების ყრილობის მონაწილეებს კანცლერი ანგელა მერკელი შეხვდება და სიტყვით მიმართავს.

მანამდე კი ყრილობის გახსნისას დელეგატებს და სტუმრებს გერმანიის ფედერალურმა პრეზიდენტმა მიმართა. ფრანკ ვალტერ შტაინმაიერის თქმით, ისინი ვინც პროფკავშირებს ებრძვიან ვერ აცნობიერებენ, არ ჰყოფნით განათლება ან შორს მხედველობა, იმის აღსაქმელად თუ რა საფრთხე შეუძლია მოუტანოს ქვეყანას პროფკავშირების მოძრაობის დაკნინებამ, რა არასამართლიანი შეიძლება გახდეს ცხოვრება და რას იწვევს უსამართლო ეკონომიკური დოვლათის გადანაწილება ისტორიაში. შტაინმაიერმა აღნიშნა, რომ გერმანიას ექნება მხოლოდ იმ ქვეყნების პარტნიორობის და დახმარების სურვილი, რომელთა ხედვა და ელემენტარული განათლება ამ ღირებულებების დამცველია.