ჭიათურაში, შუქრუთის მაღაროს ჩამონგრევის შედეგად დღეს გარდაცვლილი 45 წლის ზაზა აბრამიშვილი, ქვეყნის მასშტაბით სამსახურებრივი მოვალეობის შესრულების დროს წელს გარდაცვლილი მე-11 მუშაა.

როგორც მაღაროელები ამბობენ, მაღაროს ჭერიდან დიდი ზომის ლოდები ჩამოიშალა და ერთ-ერთი ლოდი სწორედ გვირაბგამყვანის პოზიციაზე მომუშავე ზაზა აბრამიშვილს დაეცა. მაღაროელები ირწმუნებიან, რომ უბანი რომელშიც ბრიგადა სამუშაოებს აწარმოებდა ავარიული იყო, თუმცა მაღაროს ადმინისტრაცია მუშებს მაინც ავალდებულებდა იქ მუშაობას.

საქართველოში, ბოლო 10 წლის განმავლობაში, საწარმოო ტრავმით 400-ზე მუშა გარდაიცვალა, ხოლო 700-ზე მეტი დასახიჩრებულია. მონაცემების 80 პროცენტი სამშენებლო კომპანიებში დასაქმებულებზე მოდის – ეს არის მონაცემები, რომელიც პროფკავშირებს აქვთ და ის არასრულია, რადგანაც პროფესიული გაერთიანების წარმომადგენლების ინფორმაციით, ზუსტად ვერ ხდება ქვეყანაში, შრომის ბაზარზე არსებული ვითარების შესწავლა.

საქართველოს პროფკავშირების გაერთიანება ხელისუფლებას მოუწოდებს, პრევენციის მიზნით ქარხნებსა და საწარმოებში უსაფრთხოების ნორმები მეტად იყოს დაცული.

“გამოსაკვლევია ისიც, ადგილი სადაც უბედური შემთხვევა მოხდა, რატომ იყო გადაუმაგრებელი და რატომ მუშაობდა ბრიგადა ღია სამთო მასის ქვეშ” აცხადებს პროფკავშირების გაერთიანების თავმჯდომარის მოადგილე თამაზ დოლაბერიძე.

ცნობილია, რომ მომხდარზე გამოძიება 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.