პროფკავშირის პროტესტმა შედეგი გამოიღო – ტყიბულში მეშახტეების აქცია დასრულდა.
გუშინ დღის მეორე ნახევარში შეხვედრა ადმინისტრაციასა და დასაქმებულებს შორის გაიმართა. შეხვედრას ესწრებოდნენ: შპს ,,საქნახშირის” (ჯი აი ჯი ჯგუფი) გენერალური დირექტორი, პარლამენტის მაჟორიტარი დეპუტატი ტყიბულიდან, იმერეთის გუბერნატორი, ტყიბულის მერი, საკრებულოს თავმჯდომარე, დარგობრივი და პირველადი პროფკავშირის წარმომადგენლები და მეშახტეები.
შეხვედრას ასევე ესწრებოდნენ კომპანია Steel International trade company-ის წარმომადგენლები, რომლებმაც განაცხადეს, რომ ორშაბათიდან შახტების ოპერირებას ისინი დაიწყებენ.
ეკონომიკის მინისტრმა პროცესში ჩართულობისთვის მადლობა გადაუხადა საქართველოს პროფესიული კავშირების გაერთიანების, დარგობრივი და პირველადი პროფკავშული ორგანიზაციის წარმომადგენლებს.
მოლაპარაკებები დასრულდა ასეთი შეთანხმებით:
26-27 სექტემბერს დასრულდება საწარმოს აქტივების გადაფორმების პროცესი და 30 სექტემბერს ახალი კომპანიის მიერ დარიგდება ხელფასი.
ოქტომბრის თვეში წარმოდგენილი იქნება შრომის უსაფრთხოების რეგლამენტი და გადაიარაღების მიმართულებით გასაწევი დამატებითი ინვესტირების დოკუმენტი.
ნოემბრის თვეში აღდგება ნახშირის მოპოვება, ორი წლის შემდეგ კი, წინასწარ შესრულებული შესაბამისი სამუშაოების შემდეგ 300 000 ტონიდან, წარმოება გაიზრდება 550 000 ტონამდე.
ახალი კომპანია გადაიბარებს ყველა ფინანსურ ვალდებულებას, რაც ,,ჯი აი ჯი ჯგუფს” ქონდა შახტაში გარდაცვლილთა და დაშავებულთა ოჯახის წევრების მიმართ.
ტყიბულის შახტებზე შრომითი და სამრეწველო პროცესები წარიმართება პროფკავშირთან ძლიერი კომუნიკაციით და გაფორმდება კოლექტიური ხელშეკრულება.
შეხვედრის დასრულების შემდეგ ეკონომიკის მინისტრმა საპროტესტო აქციის მონაწილეებს მოლაპარაკების შედეგები გააცნო. აქციის მონაწილეებმა მას რამდენიმე დეტალის დამაზუსტებელი შეკითხვა დაუსვეს და პასუხების მიღების შემდეგ პირველადი პროფკავშული ორგანიზაციის თავმჯდომარემ საპროტესტო აქციის დასრულების გადაწყვეტილება გამოაცხადა.
მიღწეული შედეგი მეშახტეებისთვის მისაღებია და დარწმუნებულები არიან, რომ მიღწეული შეთანხმების სრულად აღსრულება შესაძლებელია მხოლოდ პროფკავშირის ჩართულობით.