ევროპის პროფკავშირების კონფედერაცია “ETUC” განცხადებას ავრცელებს, სადაც ცალსახად არის დაფიქსირებული, რომ საქართველომ ევროკავშირის კანდიდატის სტატუსი უნდა მიიღოს.

წერილში საუბარია როგორც საქართველოსთვის ევროკავშირის კანდიდატის სტატუსის მიღებასთან დაკავშირებით, ევროკავშირი-საქართველოს ასოცირების საბჭოს სხდომის წინ ევროპის პროფკავშირების კონფედერაციის “ETUC” კონფედერალური მდივნის ლიინა კარის მიერ გაკეთებულ განცხადებაზე, ასევე, იმ პრიორიტეტებზე, რომელიც შრომითი უფლებების გაუმჯობესებისა და დაცვის კუთხით უნდა განხორციელდეს.

“ევროპის პროფკავშირების კონფედერაცია მწუხარებას გამოთქვამს იმ ფაქტის შესახებ, რომ ევროკავშირში გაწევრიანების საკითხი  საქართველოსთვის დახურული რჩება.

ლიინა კარმა, ევროპის პროფკავშირების კონფედერაციის კონფედერალურმა მდივანმა, (ევროკავშირი-საქართველოს ასოცირების საბჭოს სხდომის წინ)  სიტყვით გამოსვლისას, განაცხადა, რომ „საქართველომ  ბევრად უფრო წინ წაიწია ასოცირების შეთანხმების განხორციელების მიმართულებით,  ვიდრე სხვა ქვეყნებმა და ქართველი ხალხი არ უნდა იყოს პოლიტიკური თამაშების მძევალი.

ევროპის პროფკავშირების კონფედერაცია და მისი წევრები  სრულად არიან მოწოდებულნი, რომ საქართველო გახდეს ევროკავშირის კანდიდატი ქვეყანა. ევროკავშირთან ასოცირების შეთანხმებამ უკვე მოიტანა მნიშვნელოვანი მიღწევები შრომის ბაზრის ინსტიტუტების აღდგენის კუთხით.  განხორციელდა შრომის კოდექსის რეფორმა, მიღებულ იქნა ჯანმრთელობისა და უსაფრთხოების კანონმდებლობა, ხელახლა შეიქმნა  შრომის ინსპექცია, ხოლო  ეროვნულ დონეზე სოციალურმა დიალოგმა  ახალი პერსპექტივები შეიძინა.

„ჩვენ ღრმად ვართ შეშფოთებულები საქართველოში პოლიტიკური ვითარების განვითარებით და იმ ფაქტით, რომ ეს საფრთხეს შეუქმნის  შემდგომ რეფორმებს და ასევე ბოლო წლების ზოგიერთ მიღწევას“,  დასძინა ლიინა კარმა.

„რაც შეიძლება მალე უნდა დადასტურდეს საქართველოს კანდიდატის სტატუსი“. ჯერ კიდევ ბევრი რამ არის გასაკეთებელი, ვიდრე  საქართველო ევროკავშირში გაწევრიანებას შეძლებს,  ოფიციალური კანდიდატის სტატუსი კი  მისთვის სტიმულის მიმცემი იქნება“.

ევროპის პროფკავშირების კონფედერაცია  მოუწოდებს  რომ პრიორიტეტი მიენიჭოს შემდეგ თემებს : დეკრეტული შვებულების საკითხების  გაუმჯობესებულ დაცვას, სოციალური ზრუნვის  სისტემებსა  (რათა წაახალისონ ქალები რომ შეუერთდნენ ისინი შრომის ბაზარს და დაძლიონ გენდერული უთანასწორობა დასაქმებაში)  და ადეკვატურ  სოციალურ  დაცვას უმუშევრობის შემწეობის სისტემის ჩათვლით. ამასთან, ხელი უნდა შეეწყოს  გაერთიანების თავისუფლებასა  და კოლექტიურ  მოლაპარაკებებს და ეროვნულ დონეზე  უნდა გაიზარდოს მინიმალური  ხელფასის ოდენობა, რომელიც  შემდგომ  კოლექტიური მოლაპარაკებებით გაძლიერდება.  ასევე,  საჭიროა  გაძლიერდეს შრომის ინსპექცია რათა მოხდეს ჯანმრთელობისა და უსაფრთხოების სტანდარტებისა და შრომითი უფლებების ზედამხედველობა  და აღსრულება” – ნათქვამია განცხადებაში.

ინგლისური ვერსია შეგიძლიათ იხილოთ ↪️ https://www.etuc.org/en/pressrelease/georgia-should-be-eu-candidate-says-etuc