თბილისის დასუფთავების სამსახურის თანამშრომლები ადმინისტრაციას უპირისპირდებიან. უკვე სამი თვეა “თბილსერვის ჯგუფსა“ და მის თანამშრომლებს შორის მოლაპარაკებები მიმდინარეობს, რომელშიც საქართველოს პროფკავშირების გაერთიანებაც არის ჩართული.

უკვე თვეებია ადმინისტრაცია და თანამშრომლები ხელფასის ოდენობაზე ვერ თანხმდებიან- მეეზოვეები, მძღოლები და სხვა დაბალი რანგის თანამშრომლები ხელფასების გაზრდას ითხოვენ, ადმინისტრაცია კი უარზეა. განსახილველ საკითხთა შორის არის სამსახურიდან გათავისუფლებულთა საკითხი, ასევე შრომის უსაფრთხოებისა და ზეგანაკვეთური სამუშაოს ანაზღაურების თემები.

“დასუფთავების სამსახურიდან“ რამდენიმე კვირის წინ გათავისუფლებული ოლგა შმოიანი “კომერსანტთან“ საუბრისას აცხადებს, რომ სამსახურიდან გათავისუფლების განცხადებაზე ხელი მოტყუებით მოაწერინეს. მისივე თქმით, 1 ოქტომბერს მასთან მივიდა უფროსი და მოსთხოვა  მისთვის გაუგებარ ქაღალდებზე ხელის მოწერა. ოლგა შმოიანი ამბობს, რომ მას ქართულად წერა-კითხვა არ ეხერხება, ამიტომ საბუთებზე ხელი მოაწერა, 10 დღის შემდეგ კი აღმოაჩინა, რომ სამსახურიდან გაათავისუფლეს.

შმოიანის ბრალდებებს არ ეთანხმებიან “თბილსერვის ჯგუფში“. კომპანიაში აცხადებენ, რომ შმოიანის გათავისუფლება მოტყუების წესით არ მომხდარა. რაც შეეხება მიზეზებს, კომპანიის იურისტი რუსუდან ჩადუნელი ამბობს, რომ ოლგა შმოიანის გათავისუფლება 8 ოქტომბერს დისციპლინური გადაცდომების გამო მოხდა.

როგორც საქართველოს პროფკავშირებში აცხადებენ, “თბილსერვის ჯგუფის“ არაქართველი თანამშრომლები მოკლებულნი არიან შესაძლებლობას მათთვის გასაგებ ენაზე გაეცნონ ხელშეკრულებას, მეტიც, თანამშრომლებს საერთოდ არ გააჩნიათ ხელშეკრულების ასლი. სწორედ ამიტომ, ოლგა შმოიანის შემთხვევის მსგავსი ფაქტი “თბილსერვის ჯგუფში“ რამდენჯერმე დაფიქსირდა.

თანამშრომლებს “თბილსერვის ჯგუფთან“ სხვა პრეტენზიებიც აქვთ. მომსახურების სფეროს, კომუნალური და ბანკების მუშაკთა პროფკავშირის თავმჯდომარის, მალხაზ ღონიაშვილის განცხადებით, წლებია თანამშრომლებს ხელფასები არ მომატებიათ, ამავე დროს არ ეძლევათ ზეგანაკვეთური საათების ანაზღაურება და დამატებით 10-დღიანი შვებულება, რომელიც მათ მავნე სამუშაოს შესრულებისთვის ეკუთვნით.

ღონიაშვილი ამბობს, რომ თანამშრომლებს საყოველთაო დაზღვევის შემოღების შემდეგ გაუუქმდათ დაზღვევაც. ამასთან, მათ სამგზავრო შეღავათების გაუქმებითაც ემუქრებიან.

“უსაფრთხოების არანაირი ნომრები არ არსებობს. არც გაფრთხილება ხდება თანამშრომლების, როგორ და რანაირად უნდა მოიქცნენ ისინი. იყო შემთხვევა, რომ თითები წააწყვიტა ჩამოვარდნილმა ურნამ ერთ-ერთ თანამშრომელს, რომელმაც მოითხოვა, რომ მკურნალობა აენაზრაურებინათ და ესეც არ აუნაზღაურეს“,- აცხადებს მალხაზ ღონიაშვილი.

პროფკავშირების ბრალდებებს უარყოფენ “თბილსერვის ჯგუფში“. კომპანიის იურისტის ინფორმაციით, უსაფრთხოების წესები ყველა თანამშრომელმა იცის და ამასთან დაკავშირებით არცერთი თანამშრომლის მხრიდან პრეტენზია არ ყოფილა. მათივე ინფორმაციით, ხდება ზეგანაკვეთური სამუშაოს ანაზღაურებაც. ხელშეკრულებებების თანამშრომლებისთვის გასაგებ ენაზე მისაწვდომობის პრობლემა კი მომავალი წლიდან მოგვარდება, მას შემდეგ, რაც ახალი ტენდერი ჩატარდება და ახალი ხელშეკრულებები გაფორმდება.

რუსუდან ჩადუნელის ცნობით, ამ დრომდე ენასთან დაკავშირებით პრობლემები არ ყოფილა. რაც შეეხება შეკითხვას, რატომ ვერ მიაღწიეს შეთანხმებას თანამშრომლებთან 3 თვის განმავლობაში, “თბილსერვისში“ პასუხობენ, რომ ძირითადი თემა ხელფასების მატებას ეხება, რომელიც ამ წლის განმავლობაში ვერ გაიზრდება. რუსუდან ჩადუნელის ინფორმაციით, ხელფასებთან დაკავშირებით გადაწყვეტილება მხოლოდ ახალი ხელშეკრულების დადების შემდეგ გახდება ცნობილი.

სამთვიანი უშედეგო მოლაპარაკებების შემდეგ პროფკავშირებმა ჯანდაცვისა და შრომის სამინისტროს მიმართეს და პროცესში მედიაციის სამსახურის ჩართვა მოითხოვეს. ჩაერთვება თუ არა პროცესში მედიატორი დღეს გახდება ცნობილი. მედიატორის დანიშვნის უფლება კი ჯანდაცვის სამინისყრო 15 დეკემბრამდე აქვს.