მსოფლიო პროფკავშირების მეხუთე კონგრესის მიმდინარეობის ფარგლებში, პროფკავშირების საერთაშორისო კონფედერაციის გენერალური საბჭოს სხდომა გაიმართა სადაც, სხვა მნიშვნელოვან საკითხებთან ერთად, ყაზახეთის პროფკავშირებისთვის წევრობის  აღდგენის საკითხი განიხილეს.

გენერალური საბჭოს წევრთა უმეტესობის უარყოფითი დამოკიდებულების მიუხედავად, პეტრიაშვილის პოზიცია და არგუმენტები გადამწყვეტი აღმოჩნდა. საბოლოოდ, კენჭისყრაზე წევრთა აბსოლუტურმა უმრავლესობამ ყაზახეთის მსოფლიო პროფკავშირულ ოჯახში დაბრუნებას მხარი დაუჭირა.

ყაზახეთის პროფკავშირების თავმჯდომარემ სატიბალდი დაულეტალინიმ ირაკლი პეტრიაშვილს დახმარებითვის მადლობა გადაუხადა და მსოფლიო პროფკავშირებში ყაზახეთის პროფკავშირის დაბრუნების მნიშვნელობაზე ისაუბრა.

„ეს გადაწყვეტილება ჩვენთვის იყო ისტორიული, მნიშვნელოვანი, რადგან დიდი ხანი ვცდილობდით ყაზახეთის მსოფლიო პროფკავშირების მოძრაობაში აღდგენას. ის ცვლილებები, რომელიც ყაზახეთის სისტემაში ახლა მიმდინარეობს, ვფიქრობ, უფლებას გვაძლევს მსოფლიო პროფკავშირების ნაწილი ვიყოთ. ხაზი მინდა გავუსვა საქართველოს პროფკავშირების თავმჯდომარის დახმარებას. ირაკლი პეტრიაშვილისგან ეს მხარდაჭერა ჩვენთვის ძალიან აუცილებელი და დროული იყო. ეს გვაძლევს ახალ შესაძლებლობებს, რომ ჩვენს ქვეყანაში წინ წავწიოთ სოციალური სამართლიანობა და გავაძლიეროთ პროფკავშირების როლი და ავტორიტეტი სამოქალაქო საზოგადოებაში. დღეს ჩვენ ვაშენებთ ახალ, სამართლიან ყაზახეთს. სწორედ ეს არის პროფკავშირული მოძრაობის პრინციპები. ვფიქრობ, ყაზახეთის პროფკავშირები მეგობარ პროფკავშირებთან, განსაკუთრებით კი საქართველოს პროფკავშირებთან ერთად, შევძლებთ ერთობლივ, სოლიდარულ პრინციპებზე დაფუძნებულ ნაყოფიერ მუშაობას“ – განაცხადა ყაზახეთის პროფკავშირების თავმჯდომარემ.

საქართველოს პროფესიული კავშირების გაერთიანების დელეგაცია მსოფლიო პროფკავშირების (ITUC) მეხუთე კონგრესში ,,ახალი სოციალური კონტრაქტი ყველასთვის“ იღებს მონაწილეობას. ყრილობა ავსტრალიაში, ქალაქ მელბურნში მიმდინარეობს.