ვეფხია ნაცვლიშვილი სს “ენერგო პრო ჯორჯიაში” 2007 წლიდან მუშაობდა. როგორც მაღალკვალიფიციური და პასუხისმგებლიანი კადრი, 2016 წელს იგი დააწინაურეს და ჭიათურის მომსახურების ცენტრის მთავარ ინჟინრად დანიშნეს.

2018 წლის 25 სექტემბერს, კომპანიამ მის მამართ დისციპლინური პასუხისმგებლობის ღონისძიება უსაფუძვლოდ გამოიყენა, ხოლო, 2019 წლის 30 აპრილს სს “ენერგო პრო ჯორჯიამ” დასაქმებული დაკავებული თანამდებობიდან გაათავისუფლა.

საკუთარი უფლებების დასაცავად, სამსახურიდან უკანონოდ გათავისუფლებულმა ვეფხია ნაცვლიშვილმა დარგობრივი პროფესიული კავშირის დახმარებით, პროფკავშირების გაერთიანებას მოგვმართა.

პროფკავშირების გაერთიანებამ საჩხერის რაიონულ სასამართლოს სარჩელით მიმართა. 2019 წლის 11 ივლისის გადაწყვეტილებით,  ვეფხია ნაცვლიშვილის მოთხოვნები დაკმაყოფილდა. კერძოდ,  მისი სამსახურიდან გათავისუფლების თაობაზე მიღებული გადაწყვეტილება გაუქმდა და კომპანიას მოსარჩელის სამსახურში აღდგენა დაევალა. ამავდროულად, კომპანიას მოსარჩელის სასარგებლოდ იძულებითი განაცდურის ანაზღაურება გათავისუფლების დღიდან  – 2019 წლის 30 აპრილიდან სამსახურში აღდგენის დღემდე დაეკისრა.

სს “ენერგო პრო ჯორჯიამ” გადაწყვეტილება  ქუთაისის სააპელაციო სასამართლოში უშედეგოდ გაასაჩივრა.  სააპელაციო პალატამ საქალაქო სასამართლოს მიერ მიღებული ვერდიქტი უცვლელად დატოვა.

სს “ენერგო პრო ჯორჯიამ” საჩივარი ახლა უკვე საქართველოს უზენაეს სასამართლოში წარადგინა. პროფკავშირების გაერთიანების იურისტმა, თამარ სურმავამ მესამე ინსტანციაშიც დაამტკიცა, რომ ვეფხია ნაცვლიშვილის სამსახურიდან გათავისუფლება სრულიად უკანონოდ მოხდა. შესაბამისად, კომპანიასმისი სამსახურში აღდგენისა და მოცდენის მთელი პერიოდის განმავლობაში იძულებითი განაცდურის ანაზრაურების ვალდებულება ჰქონდა.

დამსაქმებელი იძულებული გახდა ვეფხია ნაცვლიშვილისთვის სოლიდური კომპენსაცია გადაეხადა. დასაქმებულს 4 წლის იძულებითი განაცდური სრულად აუნაზღაურდა.