კომპანიის ხელმძღვანელებთან საკმაოდ მძიმე და ხანგრძლივი მოლაპარაკებების შედეგად, რომელშიც ჩართული იყო როგორც საქართველოს პროფესიული კავშირების ხელმძღვანელობა, ასევე დარგობრივი და პირველადი ორგანიზაციის წარმომადგენლობა, მიღწეული იქნა შეთანხმება შემდეგ საკითხებთან დაკავშირებით:

შპს ,,ჯორჯიან მანგანეზი“-ს სალიცენზიო უფლებამოსილების ფარგლებში მომუშავე ჭიათურის ყველა ობიექტის დასაქმებულს, შრომის ანაზღაურება გაეზარდება 250 დარიცხული ლარის ოდენობით, ძირითად სატარიფო სარგოში შეტანით,

წელიწადში ოთხჯერ, აღდგომის, მარიამობის, გიორგობისა და სამთოელთა  სადღესასწაულო დღის აღსანიშნავად, დასაქმებულებს გადაეცემათ ხელზე ასაღები 50 ლარი,

2021 წლის 1-ლი მაისიდან მოხდება დასაქმებულთა ხელფასების ინდექსაცია 5,2%-ით, საქართველოს სტატისტიკის ეროვნული სამსახურის მიერ გამოქვეყნებული 2020 წლის ინფლაციის მაჩვენებლის შესაბამისად,

ყოველი მომდევნო წლის იანვრიდან, მოხდება დასაქმებულთა ხელფასების ინდექსაცია, საქართველოს სტატისტიკის ეროვნული სამსახურის მიერ გამოქვეყნებული წინა წლის ინფლაციის მაჩვენებლის შესაბამისად.

აღნიშნული შეთანხმების 1-ელ პუნქტთან დაკავშირებით კომპანიასთან ცალკე შეთანხმება გაფორმდა, რომელიც მოიცავს ზესტაფონის ფეროშენადნობთა ქარხნის შრომით კოლექტივს, ანუ 2021 წლის 1-ლი მაისიდან, ჭიათურელი მაღაროელების მსგავსად, ზესტაფონელი მეტალურგების ხელფასებიც გაიზარდება დარიცხული 250 ლარის ოდენობით.

მნიშვნელოვანია, რომ ჭიათურელი მაღაროელებისთვის მიღწეული დანარჩენი სოციალური ბენეფიტები, ზესტაფონელი მეტალურგებისთვის უკვე რამდენიმე წელია გათვალისწინებულია კოლექტიური ხელშეკრულებით.

გარდა სოციალური ბენეფიტებისა, კოლექტიური ხელშეკრულებით გათვალისწინებულია ორმხრივი პასუხისმგებლობები და ვალდებულებები, რაც მხარეთა შორის პარტნიორულ პრინციპებზე დამყარებული სოციალური დიალოგის კიდევ უფრო გაღრმავებისა და განვითარებას შეუწყობს ხელს.