2023 წლის 13 სექტემბერს შრომის საერთაშორისო ორგანიზაციის ორგანიზებით, გაიმართა სამმხრივი საკონსულტაციო შეხვედრა, რომელსაც შრომის საერთაშორისო ორგანიზაციის, პროფკავშირების გაერთიანების, სახელმწიფოს, შვედეთის საელჩოსა და დამსაქმებელთა ასოციაციის წარმომადგენლები ესწრებოდნენ.

შეხვედრაზე განხილული იქნა საქართველოში შსო-ს ღირსეული სამუშაო პროგრამის დაწყების საკითხი, რასაც პროფკავშირების გაერთიანება მრავალი წელია დღის წესრიგში აქტიურად აყენებს.

პროფკავშირების გაერთიანების თავმჯდომარემ, ირაკლი პეტრიაშვილმა სწორედ პროგრამის მნიშვნელობაზე ისაუბრა.

აღნიშნული პროგრამა მოიცავს ოთხ ძირითად მიმართულებას, როგორიცაა:

სამუშაო ადგილების და მეწარმეობის ხელშეწყობა, სამუშაოზე უფლებების გარანტია, სოციალური დაცვა და სოციალური დიალოგის ხელშეწყობა, რაც ერთგვარი საშუალება იქნება იმისა, რომ პროფკავშირებმა ქვეყნის პოლიტიკურ  დღის წესრიგში  აქტიურად დააყენოს დასაქმებულთა შრომითი პირობების გასაუმჯობესებლად ისეთი პრიორიტეტული საკითხები როგორიცაა: მინიმალური ხელფასი, უმუშევრობის შემწეობა, გენდერული თანასწორობა და ქალთა შრომითი უფლებები, არაფორმალურ ეკონომიკაში და პლატფორმულ დასაქმებაში ჩართული პირების შრომითი უფლებები და ა.შ.

შეხვედრის მეორე ნაწილში, ასევე, შრომის უსაფრთხოებისა და ჯანმრთელობის შესახებ (OSH) პროექტის სამუშაო ვერსია განიხილეს.