23 დეკემბერს, ჭიათურაში, შპს ” ჯორჯიან მანგანეზის” ოფისთან, საქართველოს მეტალურგიული, სამთო და ქიმიური მრეწველობის მუშაკთა პროფკავშირის მიერ ორგანიზებული აქცია გაიმართა მაღაროელთა მხარდასაჭერად, რომლებიც ღირსეულ სამუშაო პირობებს ითხოვენ კომპანიის ადმინისტრაციისაგან. აქციაში მონაწილეობა საქართველოს სხვადასხვა საწარმოში დასაქმებულთა პროფკავშირების წარმომადგენლებმა და სტუდენტებმა მიიღეს. ასევე, აქციას შეუერთდნენ ჭიათურელი მოსახლეებიც.
აქციის ძირითადი მოთხოვნები იყო კოლექტიური ხელშეკრულების გაფორმება დარგობრივ და პირველად პროფკავშირულ ორგანიზაციასთან, ხელფასების ინდექსირება ინფლაციის მიხედვით, ასევე შრომის უსაფრთხოებისა და ჰიგიენური ნორმების უზრუნველყოფა. აქციაზე გაჟღერდა შემდეგი ლოზუნგები: ” შეწყდეს დისკრიმინაცია პროფკავშირული ნიშნით”, “მოვითხოვთ ზეგანაკვეთური შრომის ანაზღაურებას”, “შრომა სისხლისა და ცრემლის გარეშე” და ა.შ. წვიმიანი ამინდის მიუხედავად, აქციამ ხმაურიანად ჩაიარა.
