შრომის ინსპექცია 1 თვეა რაც შექმნილია და შესაბამისი სპეციალისტებისა და ინსპექტორების გადამზადება უახლოეს დღეებში დაიწყება,- ამის შესახებ შრომის, ჯანმრთელობისა და სოციალური დაცვის მინისტრმა დავით სერგეენკომ ჟურნალისტებს 1 აპრილს განუცხადა.
“გვქონდა შეხვედრა ადამიანის უფლებების დაცვაზე, რომელსაც ასევე ესწრებოდა უჩა ნანუაშვილი, მის ერთ-ერთი რეკომენდაცია იყო რომ არ არის შექმნილი შრომის ინსპექცია.ჩვენ იქვე გავუზიარეთ ინფორმაცია, მე წუხილი გამოვთქვი, რომ ის არ იყო ამის შესახებ ინფორმირებული. ერთი თვეა რაც შეიქმნა შრომის ინსპექცია. უახლოეს დღეებში დაიწყება შესაბამისი სპეციალისტების, ინსპექტორების გადამზადება და ის გეგმა, წლის განმავლობაში რაც განხორციელდება, შრომის საერთაშორისო ორგანიზაციების ექსპერტებთან ერთად გავწერეთ და მჯერა, რომ ეს განხორციელდება და ამ მიმართულების მართვა იქნება ეფექტური”,- განაცხადა დავით სერგეენკომ.
მისივე თქმით, დაჯარიმების ფუნქცია შესაძლოა, მიმდინარე წლიდან იყოს. რაც შეეხება ჯარიმებს, სერგეენკოს განმარტებით, გაწერილია დარღვევების სიმძიმის ხარისხი- მსუბუქი ხარისხის დარღვევებზე პირველი ნაბიჯი სარეკომენდაციოა. რაც შეეხება საჯარიმო სანქციების რაოდენობას, სერგეენკოს თქმით, ეს შრომის კანონში უნდა ჩაიდოს, რაც პარლამენტის პრეროგატივაა.
“შრომის ინსპექციის წესდებაში ეს ყველაფერი გაწერილია.გაწერილია დარღვევების სიმძიმის ხარისხი. მსუბუქი ხარისხის დარღვევებზე პირველი ნაბიჯია სარეკომენდაციო, როდესაც შრომის ინსპექტორი რეკომენდაციას უწევს, თუ როგორ გამოასწოროს, დანარჩენი ყველაფერი გაწერილია. რაც შეეხება ჯარიმებს, საჯარიმო სანქციების რაოდენობას, ეს უკვე უნდა ჩაიდოს შრომის კანონში, შესაბამისად, ეს იქნება პარლამენტის პრეროგატივა”,-აღნიშნა დავით სერგეენკომ.
