გასულ კვირას ტყიბულის მინდელის მაღაროში მომხდარი ხანძრისას დაშავებული ბეჟან ჭუმბურიძე- დღეს გარდაიცვალა. ჭუმბურძე 7 მაღაროელიდან ერთ-ერთია, რომელმაც უბედური შემთხვევის შედეგად მძიმე დამწვრობა მიიღო. მას თბილისის დამწვრობის ცენტრში მკურნალობდნენ.

შეგახსენებთ სამთო მაშველებით დაკომპლექტებული ჯგუფი ნახშირის ფენებში წარმოქმნილი ხანძრის ლოკალიზებას აწარმოებდა – რა დროსაც სამთო დარტყმის შედეგად ძლიერი ტალღა წარმოიქმნა. ცხელი ჰაერის გამოფრქვევის შედეგად გელა ქათამაძემ, გოჩა კუბლაშვილმა, ბეჟან ჭუმბურიძემ, თამაზ ფუტკარაძემ, თამაზ გაბელაშვილმა, ვაჟა კირკიტაძემ და მალხაზ ბოჭორიშვილმა სახისა და ხელების დამწვრობა მიიღეს. 6 მათგანი რეანომობილებით თბილისში გადმოიყვანეს, მკურნალობის მე 9 დღეს ჭუმბურიძე გარდაიცვალა.

კიდევ ერთი ტრაგიკული შემთხვევა დღეს რუსთავის მეტალურგიულ ქარხანაში მოხდა. ამ დროისთვის არსებული ინფორმაციით საწარმოს ფოლადსადნობი საამქროს ოპერატორი, ნუკრი ქიმაძე ელექტროტრავმის შედეგად გარდაიცვალა. ადმინისტრაცია მომხდარს ქიმაძის პირად გაუფრთხილებლობას აბრალებს.

პროფკავშირები ფაქტის სასწრაფო გამოკვლევას და საგამოძიებო ჯგუფში ჩართვას ითხოვს. მეტალურგთა პროფკავშირი მზადყოფნას გამოთქვამს დაიცვას ქიმაძის ოჯახის ინტერესები და უფლებები.

ბოლო პერიოდში, უბედური შემთხვევების რაოდენობის საგრძნობი და შემაშფოთებელი მატებიდან გამომდინარე , მეტალურგთა პროფკავშირი ხელისუფლებისგან მოითხოვს შრომის ინსპექციის სასწრაფო აღდგენას. სწორედ ამ უწყებამ უნდა იზრუნოს დასაქმებულთა უსაფრთხოებაზე და დაარეგულიროს და გააკონტროლოს ვითარება საწარმოებში. მხოლოდ გასულ წელს სამსახურეობრივი მოვალეობისას საქართველოში 30 ადამიანი დაიღუპა და 32 დაშავდა.