დღეს, საქართველოს პროფესიული კავშირების გაერთიანებაში, პროფესიული კავშირის ლიდერები, ახლადდაარსებული “თბილისის ყვითელი მიკროავტობუსების პროფკავშირის” წევრებსა და აქტივისტებს შეხვდნენ. საქართველოს პროფესიული კავშირების გაერთიანებაში შემავალი “ტრანსპორტისა და გზების მუშაკთა პროფესიული კავშირი“ წლების მანძილზე ცდილობდა ყვითელი მიკროავტობუსების მძღოლების პროფკავშირში გაწევრიანებას, თუმცა ხელოვნურად შექმნილი ბარიერების გამო, ყვითელი მიკროავტობუსების მძღოლებმა პროფკავშირული ორგანიზაცია ახლაღა დააარსეს.
საქართველოს პროფესიული კავშირების გაერთანების თავმჯდომარემ, ირაკლი პეტრიაშვილმა, მძღოლებს ერთიანობისა და ურთიერთსოლიდარობისაკენ მოუწოდა. შეხვედრის დროს მან ასევე აღნიშნა, რომ მიუხედავად წლების მანძილზე პროფკავშირის წინააღმდეგ გაჩაღებული ბრძოლისა, ეს ორგანიზაცია მომავალში კიდევ უფრო გაიზრდება და გაძლიერდება.
“გილოცავთ ახალი პროფკავშირის დაარსებას. პროფკავშირი არის აპოლიტიკური ორგანიზაცია. ჩვენი ერთადერთი მიზანი არის თქვენი უფლებების დაცვა. ჩვენ არ ვაპირებთ პოლიტიკაში ჩარევას. ამიტომ უფრო გულრწფელები ვართ თქვენთან საუბრის დროს. როგორც არ უნდა შეგვიქმნან პრობლემები, როგორც არ უნდა აურიონ ტვინი დასაქმებულებს, პროფკავშირში ადამიანები მაინც გაწევრიანდებიან. ეს გარდაუვალია!
რაც უფრო ნაკლები იქნება მძღოლის ჯიბიდან გასავალი, მით მეტი შემოსავალი ექნება მათ ოჯახებს. სოციალური მდგომარეობა თუ უკეთესი იქნება, ამით ყველა კმაყოფილი იქნება. მძღოლისათვის მეტი შემოსავალი ნიშნავს იმას, რომ მისი ოჯახი მაგალითად მეტ პომიდორსა და მეტ ფქვილს იყიდის და ამით ფქვილისა და პომიდვრის გამყიდველებიც ისარგებლებენ. პროფკავშირში გაწევრიანებული ადამიანების მრავალარიცხოვნება მნიშვნელოვანია იმითაც, რომ ჩვენს მოქმედებებს ბევრად უფრო სოლიდური სახე მიეცემა. სად ერთი ადამიანი რომ მოითხოვს საკუთარი უფლებების დაცვას და ვთქვათ 50 ათასი ადამიანი… ჩვენი წევრების სია მზარდია. წესით კიდევ უფრო მეტი წევრი უნდა გვყავდეს რომ არა წინა ხელისუფლების დროს ჩვენზე განხორციელებული მრავალმხრივი ზეწოლა“.
“ტრანსპორტისა და გზების მუშაკთა პროფესიული კავშირის“ პრეზიდენტი, ლავრენტი ალანია აცხადებს რომ, ახლადდაარსებული “თბილისის ყვითელი მიკროავტობუსების პროფკავშირის” შექმნის დროს გარკვეულ წინააღმდეგობებს გადააწყდნენ. თუმცა, ეს პრობლემები საბოლოოდ მაინც დასაქმებულთა სასარგებლოდ გადაწყდა.
“ყვითელი მიკროავტობუსების მძღოლები ცოტა ხნის წინ ძალით გააწევრიანეს ე.წ. ყვითელ პროფკავშირში, სადაც დასაქმებულების უფლებებზე არავინ ზრუნავდა. მერიის სტრუქტურების წარმომადგენლები მძღოლებს მოუწოდებდნენ, რომ ჩვენს პროფესიულ კავშირში არ შემოსულიყვნენ. თუმცა, ყველაფერი კარგად დასრულდა. მძღოლებმა შექმნეს დამოუკიდებელი პროფკავშირი და გაწევრიანდნენ ჩვენთან. ეს ასეც უნდა მომხდარიყო! ჩვენ იმედი გვაქვს, რომ ამ ორგანიზაციაში იქნება 80%–იანი გაწევრიანება (ჩვენი წინასწარი მონახაზით) და ეს ადამიანები საკუთარი უფლებების დაცვას ბევრად უფრო უკეთ შეძლებენ!“.