საქართველოს ენერგეტიკისა და წყალმომმარაგებელ კომისიასთან ენერგეტიკის მუშაკთა პროფკავშირმა საპროტესტო აქცია გამართა. ენერგეტიკოსები ტარიფების დათვლის არასათანადო მეთოდოლოგიას აპროტესტებენ და ხელფასების არანაკლებ 30%-იან ზრდას ითხოვენ “ენერგო პრო ჯორჯიაში” დასაქმებულთათვის, ასევე ზეგანაკვეთური სამუშაოს ანაზღაურებას.
როგორც აქციის მონაწილეები აცხადებენ, მათ არაერთხელ მიმართეს სემეკს, ტარიფის ზრდამდე გაეთვალისწინებინა სახელფასო ფონდის 30%იანი ზრდის საჭიროება, თუმცა ამ მოთხოვნებმა შედეგი არ გამოიღო. მათი თქმით, ტარიფის ზრდის შემდეგ სამუშაოს მოცულობა საგრძნობლად გაიზარდა, თუმცა დასაქმებულთა ხელფასები საკმაოდ დაბალია და 300-დან 500 ლარამდე მერყეობს, 30% იანი ზრდა კი დიდ თანხებთან არ არის დაკავშირებული, რადგან დაახლოებით 100-150 ლარს შეადგენს თითოეული მუშაკისათვის.
“ის ენერგეტიკული მდგრადობა, რის დარეგულირებასაც სემეკი ცდილობს, სწორედ ამ ადამიანთა შრომით ხერხდება, მშიერი ენერგეტიკოსი კი ვერ შექმნის მდგრად ენერგეტიკას” – აცხადებს ნაზი კიკოლაიშვილი, “ენერგო პრო ჯორჯიას” პროფკავშირის თავმჯდომარე. მისი თქმით, კომისია ხელფასების ზრდის საწინააღმდეგო არგუმენტად ტარიფების დათვლის მეთოდოლოგიას ასახელებს.
აქციის მონაწილეები შესაბამისი სხდომის ჩატარებას ითხოვენ, სადაც აღნიშნული საკითხების განხილვა გახდება შესაძლებელი.
