ირაკლი პეტრიაშვილი სახალხო დამცველის ანგარიშზე და პროკურორების გათავისუფლებაზე

“რეპორტიორის” პრესკლუბში, “რეპორტორის“ მიწვევით, ქართული მედიის წარმომადგენლებისათვის, საქართველოს პროფესიული კავშირების გაერთიანების თავმჯდომარის, ირაკლი პეტრიაშვილის პრესკონფერენცია გაიმართა.

ირაკლი პეტრიაშვილმა თავის გამოსვლაში ვრცლად ისაუბრა სახალხო დამცველის ახალ ანგარიშზე და მისი თქმით, წინა სახალხო დამცველის ანგარიშთან შედარებით, დასაქმებულის უფლებები ახალ ანგარიშში უკეთაა წარმოჩენილი. 12 დეკემბერს პროფკავშირების გაერთიანების თავმჯდომარე სახალხო დამცველის ანგარიშის საჯარო განხილვასაც დაესწრო და თავისი დადებითი პოზიცია იქაც დააფიქსირა.

მედიასთან შეხვედრის დროს, მან ასევე გაუსვა ხაზი იმასაც, რომ აუცილებელია შრომის უსაფრთხოების სამსახურის (შრომის დაცვის ინსპექციის) შექმნაც, რაც დასაქმებულებისათვის ერთ–ერთი მნიშვნელოვანი საკითხია.

ირაკლი პეტრიაშვილის განცხადებით, უნდა ამოქმედდეს ამჟამად არაქმედითი სახელმწიფო სამმხრივი კომისია, რადგან დიალოგის არარსებობის გამო, ქვეყანაში ბევრი სამეწარმეო პრობლემა ვერ გვარდება და მეტიც – პრობლემები უფრო მეტად რთულდება. სამმხრივი კომისიის გაჩერება არც ევროპას მოსწონს და ამ ფაქტზე ევროპელ პარტნიორებს უარყოფითი რეაგირება აქვთ. ირაკლი პეტრიაშვილს ასევე არ მოსწონს ის, რაც ხდება პროკურატურაში.

“არ ვფიქრობ, რომ ლოგიკურია, ერთი ხელის მოსმით ხალხის გაშვება. როცა იცი წინა ხელისუფლების მსგავს ნაბიჯებს რა უარყოფითი მუხტი მოჰყვებოდა. არსებობს უამრავი პროკურორი, რომელმაც სიბინძურე აკეთა,  ეს შესაბამისმა სამსახურმა უნდა მოიკვლიოს. მაგრამ, ზოგი კვალიფიციური პროკურორი საზღვარგარეთიდან გულანთებული სპეციალურად (მაგალითად 2012 წელს) ჩამოვიდა, მიატოვა კარგი პირობები ავტორიტეულ ორგანიზაციაში და აქ კი ერთი ხელის მოსმით გაუშვეს სამსახურიდან. უსამართლოდ გათავისუფლებულ ხუთ პროკურორთან ერთად, (დაუზუსტებელი ინფორმაციით სულ 176 ადამიანია გათავისუფლებული) ამ ხალხის მხარდაჭერის მიზნით,  ჩვენც ვამზადებთ სარჩელს, ვგეგმავთ სპეციალურ პრესკონფერენციას პროკურორებთან ერთად და მოვითხოვთ ამ ადამიანების სამსახურებში აღდგენას”– აცხადებს ირაკლი პეტრიაშვილი.reportior3 reportiorreportior1` reportior2