პროფკავშირების გაერთიანების თავმჯდომარემ, ირაკლი პეტრიაშვილმა ავსტრიის პროფკავშირების კონფედერაციის (OGB) მე-20 ფედერალურ კონგრესში მიიღო მონაწილეობა.

მისასალმებელი სიტყვით გამოვიდნენ – ÖGB-ს პრეზიდენტი ვოლფგანგ კაციანი, ესთერ ლინჩი – ევროპის პროფკავშირების კონფედერაციის (ETUC) გენერალური მდივანი, მიკაელ ლუდვიგი – ვენის მერი, კარლ ნეჰამერი – ფედერალური კანცლერი და ალექსანდრე ვან დერ ბელენი – ფედერალური პრეზიდენტი.
კონგრესის მონაწილეების, მათ შორის, საქართველოს პროფკავშირების გაერთიანების თავმჯდომარის ჩართულობით, გაიმართა დისკუსია.

შეხვედრებზე თემატურად განიხილეს ისეთი მნიშვნელოვანი საკითხები, როგორიცაა: სოციალური უზრუნველყოფა და მასთან დაკავშირებული გამოწვევები, მათ შორის: სიღარიბე, სოციალური დახმარება, განათლება…
ასევე, ყურადღება გამახვილდა შრომის ბაზრის პოლიტიკაზე, სამუშაო და საშემოსავლო მიმართულებაზე, დემოკრატიის აუცილებლობაზე სამუშაო ადგილზე თანამონაწილეობის კუთხით;
ამასთან, კონგრესზე მიწვეულმა საერთაშორისო სტუმრებმა განიხილეს ევროპასა და ევროკავშირში არსებული სტანდარტები და სამომავლო გეგმები.

ვიზიტის ფარგლებში, საქართველოს პროფკავშირების გაერთიანების თავმჯდომარემ შეხვედრები გამართა პოლიტიკოსებთან და საქართველოს ევროპულ მომავალზე, ქართველი ხალხის ურყევ ნებაზე – საქართველოსთვის კანდიდატის სტატუსის მინიჭების მნიშვნელობასა და აუცილებლობაზე ისაუბრა.

ირაკლი პეტრიაშვილი ასევე, ვენის მერის მიქაელ ლუდვიგის მიერ გამართულ მიღებასაც დაესწრო.