“თუ არ დასვამ სკამზე, პროფკავშირი ფეხზე ადგება!“ – აქცია ბენზინგასამართ სადგურთან

თბილისში, კახეთის გზატკეცილზე მდებარე კომპანია “სოკარის“ ბენზინგასამართ სადგურთან, საქართველოს პროფკავშირების გაერთიანების ახალგაზრდული ფრთის წევრებმა აქცია–პერფორმანსი გამართეს. ახალგაზრდები კომპანიის ხელმძღვანელებისგან, ავტოგასამართი სადგურების თანამშრომლების უფლებების დაცვას მოითხოვენ. როგორც იცით, აღნიშნული კომპანიის ბენზინგასამართ სადგურებზე მომუშავე ადამიანებს ხშირ შემთხვევაში, სამუშაო საათებში სკამზე დაჯდომაც კი ეკრძალებათ, რაც შრომის საერთაშორისო  ნორმების აშკარა და ღია დარღვეაა, რადგან გარკვეული პერიოდის მანძილზე ფეხზე დგომის შემდეგ, ადამიანის ჯანმრთელობისათვის ცოტა ხნით დაჯდომა საჭირო და აუცილებელია, რაც უკვე კარგად იციან ევროპის ქვეყნებში და ეს პრობლემა იქ არ არსებობს.

“სოკარის“ ავტოგასამართ სადგურზე პროფკავშირელმა ახალგაზრდებმა  სიმბოლურად დაალაგეს სკამები და სადგურის თანამშრომლებს ამ სკამებზე ცოტა ხნით ჩამოჯდომა და დასვენება შესთავაზეს. აღსანიშნავია, რომ ზოგიერთი თანამშრომელი ამ შეთავაზებას ხალისით დათანხმდა, რაც კიდევ ერთხელ ცხადყოფს, რომ აღნიშნული საკითხი მართლაც პრობლემურია და მოგვარებას საჭიროებს. ავტოგასამართ სადგურთან მიტანილ საპროტესტო პლაკატებზე ეწერა: “მუშა დ არაა მონა“, “სკამები ძვირი არ ღირს“, “მათ აქვთ დაჯდომის უფლება“, “თუ არ დასვამ სკამზე, პროფკავშირი ფეხზე ადგება!“ და სხვა…

როგორც პროფკავშირების გაერთიანების ახალგაზრდული ფრთის ხელმძღვანელი, გიორგი აფციაური აცხადებს, მათ “სოკარის“ წარმომადგენელი შეხვდა და პირობა მისცა, რომ აღნიშნული საკითხის შესახებ კომპანიის ხელმძღვანელობას ეცნობება. აფციაური გამოთქვამს იმედს, რომ ეს პრობლემა ადვილად და მყისიერად მოგვარდება. წინააღმდეგ შემთხვევაში, ახალგაზრდები მსგავსი ტიპის აქციებს მანამდე გააგრძელებენ, სანამ დასაქმებულთა კანონიერი მოთხოვნები არ იქნება შესრულებული.axalgazrdebis aqcia