ბათუმის საზღვაო პორტის თანამშრომლებმა დაიწყეს შიმშილობის აქცია, რომელშიც ამ დროის მონაცემებით, 12 ადამიანი მონაწილეობს.

პროტესტის მიზეზია საზღვაო ნავსადგურში დაწყებული რეორგანიზაცია, რომლის გამოც, სამსახურის გარეშე წინასწარი ინფორმაციით 30 ადამიანი დარჩება.

ბათუმის საზღვაო ნავსადგურის თანამშრომლები ადმინისტრაციულ შენობასთან დირექტორის გადაყენების მოთხოვნით არიან შეკრებილნი. მათი განმარტებით, პროტესტის უკიდურეს ზომას ისინი იქამდე გააგრძელებენ, სანამ მათი მოთხოვნა არ შესრულდება. ბათუმის ნავსადგურის თანამშრომელთა თქმით, დაწესებულებაში რეორგანიზაციის პროცესი ფარულად მიმდინარეობს.

 

პორტის პროფკავშირის ლიდერის, ამირან მიქელაძე ამბობს, რომ პორტს ნავმისადგომის იჯარით გაცემა სურს, რაც შემდგომ არასაპენსიო ასაკის თანამშრომლების გათავისუფლებას გამოიწვევს. იანვრიდან დღემდე ასაკით პენსიონერი 26 ადამიანი უკვე დაითოხვეს სამახურიდან. „იყო დაპირებები, რომ პორტში სამუშაოდ მიიღებდნენ ამ ადამიანების ოჯახის წევრებს, რაც არ მოხდა. მხოლოდ მოხდა ის, რომ მორალური ზეწოლით გაუშვეს 26 პენსიონერი სამუშაოდან. ეს იმას ნიშნავს, რომ ადამიანები დარჩებიან უმუშევარი, ბანკის ვალებით,“-ამბობს მიქელაძე.

თავის მხრივ, ბათუმის პორტის ადმინისტრაცია რეორგანიზაციას გარდაუვალს უწოდებს და თანამშრომლებს პირობებზე მოლაპარაკებას სთავაზობს. ბათუმის საზღვაო ნავსადგურს მართავს ბათუმის ნავთობტერმინალი, რომლის მფლობელი 2008 წელს გახდა ყაზახეთის ნაციონალური კომპანიის, „ყაზმუნაიგაზ“-ის შვილობილი კომპანია „ყაზტრანსოილი.“