23.06.11 თელავის რაიონის სოფელ კურდღელაურში, მიმდინარე წლის 22 ივნისს, ინდივიდუალური მეწარმის, გურამ მჭედლიშვილის რძის გადამამუშავებელ საამქროში, ორთქლის ქვაბის აფეთქების შედეგად, საშუალო სიმძიმის ტრავმა მიიღო გურამ მჭედლიშვილის მეუღლემ 50 წლის სულიკო კვანჭიანმა და მსუბუქად დაშავდა დასაქმებული ცოტნე მამუკელაშვილი.

ეს უბედური შემთხვევა და სხვა ტრავმები გამოწვეულია იმით, რომ ქვეყანაში აღარ ფუნქციონირებს შრომის სახელმწიფო ინსპექცია, რომელიც აწარმოებდა მონიტორინგს შრომის დაცვისათვის მიმდინარე სამუშაოებზე ყველა საწარმოში, ხოლო ტექნიკური ზედამხედველობის ინსპექცია რეგისტრაციაში ატარებდა, ნებართვებს იძლეოდა და ამოწმებდა საშიში საწარმოო ობიექტების (მაღაროები, შახტები, მეტალურგიული საწარმოები, ორთქლის ქვაბები, ამწე მექანიზმები, წნევაზე მომუშავე ჭურჭლები, გაზზე მომუშავე დანადგარები და სხვა) ტექნიკურ მდგომარეობას. დღეს, ამ უწყებას წინასწარი შემოწმებების ჩატარების უფლება აღარ აქვს. ამის გამო, გახშირდა უბედური შემთხვევების რაოდენობა, რომლებიც ლეტალური შედეგებით მთავრდება.

მაგალითად, ბათუმის საერთაშორის საკონტეინერო ტერმინალის გასახდელში, 9 თებერვალს, გაჩნდა ხანძარი, რომლის შედეგადაც დაიღუპა დოკერი მ. ლორთქიფანიძე; 9 მაისს შ.პ.ს. ”ჯორჯიან მანგანეზის“ ზესტაფონის ფეროშენადნობთა ქარხანაში გაუმართავი ამწეთი მუშაობისას მომხდარი უბედური შემთხვევის შედეგად, მძიმე ტრავმა აშკარა ინვალიდობით მიიღო მდნობელმა ს. ქვათაძემ, ბათუმში, 26 მაისს, შ.პ.ს. „ნოვა-2007“–ში სატვირთო ამწე „პიონერის“ ბაგირის გაწყვეტამ უბედური შემთხვევა გამოიწვია - დაიღუპა 3 მუშაკი (ბერიძე, მაკარაძე, ბოჭორიშვილი), ასევე ბათუმში, 1 ივნისს, სავარაუდოდ, ბუნებრივი აირის გაჟონვის შედეგად, მოხდა აფეთქება შ.პ.ს. „ხელვაჩაურის პურპროდუქტების“ საქვაბეში, რის დროსაც დაიღუპნენ ცეცხლფარეში ბ. კირკიტაძე და ცვლის უფროსი ე. ზაქარაძე, დაზიანდა ერთი მუშაკი.

მიმდინარე წლის 5 ივნისს, ბათუმში, სამშენებლო ფირმა „პროგრესი-4“–ში, საამშენებლო სამუშაოების შესრულებისას, მშენებლობის მეათე სართულიდან გადმოვარდა რ. სურმანიძე. მიღებული ტრავმების შედეგად იგი ადგილზევე დაიღუპა.